"Sumqayıt" futbol klubunun son turlarda eniş yaşaması, ölkə kubokunda mübarizəni dayandırması yerli azarkeşləri özündən çıxarıb. Kubokun 1/4 final mərhələsinin cavab oyunu çərçivəsində "Zirə" ilə matçdan sonra futbolçulara etriaz edən sumqayıtlı fanatlar daha bir sərt addım atmağa qərar verib.
Sport24.az-a etibarlı mənbədən daxil olan məlumata görə, "Gənclik şəhəri"nin təmsilçisinin rəsmi fanklubu komandanın bu gün səfərdə keçirəcəyi "Karvan-Yevlax"la görüşünü boykot edəcək.
Fanatlar bununla bir daha futbolçulara etirazlarını bildirmək istəyirlər. Fanklub üzvlərindən biri saytımıza açıqlamasında "daim "Sumqayıt"ın yanında olmuşuq. Cari mövsümdə istər ev, istərsə də səfər qarşılaşmalarında futbolçuları dəstəkləmişik. Ancaq "Karvan-Yevlax"la görüşü boykot etməyə qərar verdik. Cari "futbol ili"ndə ilk dəfə bu addımı atırıq", - söyləyərək, qərarın nəticələrə uyğun davam edəcəyini də bildirib.
Qeyd edək ki, hazırda "Sumqayıt"ın aktivində 31 xal var.
