"Bu gün saat 08:30-da Sumqayıtdan Bakıya yola düşməli olan qatar reysi xəbərdarlıq olunmadan ləğv edilib".
Bununla bağlı Sumqayit24.az-a sərnişinlərdən biri şikayət ünvanlayıb. O bildirib ki, vətəndaşlar növbəti qatara minmək üçün 1 saata yaxın gözləməli olublar. Nəticədə getdikləri ünvana gecikiblər.
Məsələ ilə bağlı "Azərbaycan Dəmir Yolları" QSC-nin (ADY) Mətbuat Xidmətindən Sumqayit24.az-ın sorğusuna cavab olaraq bildirilib ki, pik saatlarda Sumqayıt stansiyasında müşahidə olunan sərnişin sıxlığını nəzərə alaraq, iş günləri Sumqayıtdan Bakıya saat 08:30-da yola düşən ekspres qatar reysinin əvəzinə saat 07:30-a yeni ekspres qatar reysi təyin edilib.
“Buna səbəb 08:30 reysinin doluluq göstəricisinin aşağı olması və saat 07:00-08:00 aralığında sərnişin tələbatının yüksəlməsi olub. Bununla əlaqədar Bakıdan Sumqayıta saat 06:58-də və Sumqayıtdan Bakıya saat 20:30-da yola düşən ekspres tipli qatar reysi ləğv edilib”.
Qurumdan əlavə edilib ki, dəyişiklik haqqında 17 sentyabr saat 18:00-dan etibarən stansiyalarda və qatarlarda elan verilib. Axşam saat 21:00-dan etibarən mobil tətbiq və saytda da hərəkət cədvəlindəki dəyişiklik qeyd olunub.
