Bakı-Sumqayıt qatarlarında ödəniş sistemi təkmilləşdirilir. Bu haqda 10 noyabr tarixində “Azərbaycan Dəmir Yolları” QSC-yə istinadən xəbər veririk.
Sözügedən qurum və Azərbaycan Beynəlxalq Bankı (ABB) arasında razılıq əldə olunub. Buna əsasən, növbəti il ərzində əlavə 100 ədəd validator, eləcə də bütün turniketlərdə təmassız ödəniş sistemindən istifadə üçün 250 yeni validator quraşdırılacaq. Abşeron dairəvi dəmir yolu xətti boyunca 14 stansiyadakı bütün turniketlərin bu sistemi dəstəkləməsi planlaşdırılır.
Azərbaycanda ictimai nəqliyyat sektorunda ilk dəfə olaraq “Google Pay” və “Apple Pay” üzərindən də turniketlərdə ödəniş etmək mümkün olacaq. “MasterCard” istifadəçilərinin xidmətdən istifadəsi üçün ABB və digər tərəfdaşlar arasında aparılan xüsusi texniki inteqrasiya işləri yaxın zamanda tamamlanacaq.
Bu barədə ADY sərnişinlərinə geniş məlumat təqdim edəcək.
