Bakı-Sumqayıt yoluna avtobus zolağının çəkilməsi məsələsi müzakirə olunur. Sumqayıt24 bu haqda 7 dekabr tarixində Avtosfer.az-a istinadən xəbər verir.
Müntəzəm sərnişindaşıma fəaliyyəti göstərən “Xaliq Faiqoğlu” şirkətindən zolağın çəkilməsi ilə bağlı aidiyyəti qurumlara dəfələrlə müraciət edilib. Lakin bütün şərait olsa da, hələlik heç bir tədbir görülməyib.
Şirkət Bakı şəhəri ilə yanaşı, Abşeron rayonu ərazisində də sərnişindaşıma xidməti göstərir. Hər səhər yaranan tıxac isə xidmətin keyfiyyətli olmasına çətinlik yaradır. On minlərlə insan bu yolda tıxacda qalır ki, nəticədə ictimai nəqliyyatın nüfuzu azalır, fərdi nəqliyyatın isə, əksinə artır. Nəticədə tıxacların miqyası daha da artır.
Avtobus zolağının təşkil edilməsi ilə avtobuslararası intervallar azalacaq, insanlar qısa vaxtda paytaxta və geriyə çata biləcəklər.
Qeyd edilənləri nəzərə alaraq, Vaz dairəsi adlanan ərazidən Bakı şəhəri, Moskva prospektinədək, habelə geriyə olmaqla xüsusi avtobus zolağının təşkil edilməsinə böyük ehtiyac var. Bu, həm təcili tibbi yardım və yanğınsöndürənlərin, eləcə də Sumqayıtdan gələn minlərə sərnişinin vaxtında və təhlükəsiz hərəkətini təmin edəcək.
