Bakı və Sumqayıt şəhərlərini birləşdirən yeni magistral avtomobil yolunun inşası planlaşdırılıb. Bu haqda 8 yanvar tarixində Sumqayıt24 xəbər verir.
Paytaxtın 2040-cı ilədək inkişafına dair baş planına əsasən, Bakı-Sumqayıt şosesində, Xırdalan və “20 Yanvar” dairələrində nəqliyyat sıxlığının qarşısının alınması məqsədilə 2-ci şimal-qərb yeni giriş-çıxış yolunun yaradılması nəzərdə tutulub.
Belə ki, Zığ-Aeroport şosesi vasitəsilə şəhərin şərq və şimal-qərb hissələrinin halqavari birləşmə marşrutunun tamamlanmasının təmin edilməsi, eləcə də Heydər Əliyev adına Beynəlxalq Hava Limanının Sumqayıt şəhəri ilə və M-1 Bakı-Quba-Rusiya Federasiyası ilə dövlət sərhədi avtomobil yolu ilə birbaşa nəqliyyat bağlantısının yaradılması məqsədilə Xırdalan-M-1 avtomobil yolu-Digah-Zabrat-Hava Limanı halqavari magistralın yaradılması planlaşdırılır.
