Baş prokuror Kamran Əliyev Sumqayıtda vətəndaş qəbulu keçirib. Sumqayıt24 bu barədə 22 noyabr tarixində Baş Prokurorluğa istinadən xəbər verir.
Qəbuldan əvvəl baş prokuror ümummilli lider Heydər Əliyevin abidəsini ziyarət edib, gül dəstələri düzərək əziz xatirəsini ehtiramla yad edib.
Sumqayıt şəhər prokurorluğunun inzibati binasında baş tutan qəbulda Sumqayıt şəhəri, Qubadlı və Abşeron rayonlarından olan vətəndaşlar iştirak ediblər. Görüşdə iştirak edən 53 vətəndaşın müraciətində qaldırılan məsələlər, o cümlədən konkret cinayət işlərinin istintaqı və törədilmiş cinayətlər barədə məlumatlar araşdırılıb.
Qəbuldan sonra Kamran Əliyev şəhər prokurorluğunda Qubadlı rayon, Sumqayıt şəhər və hərbi prokurorluqlarının əməkdaşlarının iştirakı ilə müşavirə keçirib. O, vətəndaşların müraciətlərinə obyektiv baxılması,qəbul işinin düzgün təşkili, cinayətkarlığa qarşı mübarizənin daha da gücləndirilməsi ilə bağlı öz tövsiyələrini verib.
