Pomidor biznesi qurmaq adı ilə dələduzluq edən şəxs Sumqayıt məhkəməsinin qərarından narazıdır.
Konkret.az-ın məlumatına görə, Ali Məhkəmədə Bəxtiyar Əsədovun barəsindəki hökmdən verilən kassasiya şikayəti üzrə məhkəmə iclası başa çatıb. Hakim Tahir Kazımovun sədrliyi ilə keçirilən prosesdə qərar elan olunub - şikayət təmin edilməyib.
İttihama görə, Bəxtiyar Əsədov özünü tanışları olan zərərçəkmişlərə pomidor məhsulunu alıb satmaqla qazanc əldə edəcəyi vədi verərək onlardan ümumilikdə 91.510 manat pulu dələduzluq yolu ilə alıb. Sonradan o, verdiyi vədlərə əməl etməyib.
Bundan başqa, Bəxtiyar Əsədov iki zərərçəkmişi Bakı şəhərində “Aptek depo” şirkətinə işə düzəlməsində köməklik edə biləcəyi barədə yalan vəd verib. O, bu yolla həmin şəxslərdən ümumilikdə 3400 manat pul alaraq dələduzluq edib.
Sumqayıt Ağır Cinayətlər Məhkəməsinin hökmü ilə o, 7 il 8 ay 28 gün müddətə azadlıqdan məhrum edilib.
