Sumqayıtda Beynəlxalq Sokrat mükafatı laureatı Şakir Həsənovun xatirə lövhəsinin açılışı olub. Sumqayıt24 bu haqda 15 iyun tarixində DünyaTV-yə istinadən xəbər verir.
Azərbaycanın tanınmış inşaatçısı, əmək ordeni və tərəqqi medalına layiq görülmüş Həsənovun lövhəsi yaşadığı 2-ci mikrorayon bina 21/27 fasadında asılıb. Çıxış edən İH-nin ərazi idarəetmə və yerli özünüidarə orqanları ilə iş şöbəsinn müdiri Gündüz Əliyev onun həyat yolu haqqında danışıb.
Qeyd edək ki, Şakir Həsənov 15 iyun 1947-ci ildə Masallı rayonunun Borodigah kəndində ziyalı ailəsində anadan olub. 1954-cü ildə həmin kəndin məktəbinin 1-ci sinfinə gedib, 1965-ci ildə orta məktəbi bitirib. O, Sumqayıtın ictimai siyasi həyatında fəal iştirak edib.
1988-ci ildən başlayaraq Azərbaycan SSR Tikinti Quraşdırma Nazirliyinin Sumqayıt Termoizolasiya QSC-də rəis vəzifəsinə təyin edilib. 1990-1995-ci illərdə Sumqayıt şəhər Sovetinin deputatı olub. O, 75 yaşında dünyasını dəyişib.
Sonda diqqətə çatdırılıb ki, Şəlalə Şakir qızı tərəfindən Azərbaycanda yerləşən iki muzeydə Şakir Rəfi oğlu Həsənovla bağlı guşə yaradılıb.
