Sumqayıtlı şagirdlər İman və Bəhrəm Məmmədzadələrin məzarını ziyarət ediblər. Sumqayıt24 bu haqda bu gün, 21 aprel tarixində xəbər verir.
Məlumata əsasən, 9 nömrəli məktəbin 5a sinif şagirdləri şəhid qardaşlarının məzarını ziyarət edib, ailə üzvləri ilə görüşüblər. Məktəblilərin sinif rəhbəri Vüqar Abdullayevdir.
İman Məmmədzadə 14 sentyabr 1998-ci ildə, Bəhram Məmmədzadə 18 aprel 2000-ci ildə Lerikdə anadan olublar. 2019-cu ilin iyununda qardaşlar Vətənə olan borcunu ödəmək üçün həqiqi hərbi xidmətə gediblər. Vətən müharibəsi zamanı Qubadlı, Füzuli, Hadrut istiqamətlərində gedən döyüşlərdə iştirak edib və böyük şücaət göstəriblər. Qəhrəman qardaşlar 1 noyabr 2020-ci ildə, eyni saatda, çiyin-çiyinə vuruşaraq Qırmızı bazar adlanan yüksəklik uğrunda gedən döyüşlərdə şəhidlik zirvəsinə ucalıblar.
Hər iki qardaş ölümlərindən sonra "Vətən uğrunda", "Cəbrayılın azad olunmasına görə", "Füzulinin azad olunmasına görə" və "Xocavəndin azad olunmasına görə" medalları ilə təltif ediliblər.
