Sumqayıtda bomju döyərək öldürən şəxsə hökm oxunub. Sumqayıt24 bu haqda 10 dekabr tarixində Pravda.az-a istinadən xəbər verir.
Hadisə 2021-ci ildə “Aviakassa” deyilən ərazinin (Sülh küçəsi) qarşısındakı meydanda baş verib. Çingiz Əliyev burada tanışı Vəlixan Həsənovla (şərti) qarşılaşıb. Olaydan bir həftə əvvəl Vəlixan şüşə ilə onun boğazını kəsdiyi üçün mübahisə yaranmışdı. Çingiz intiqamını almaq üçün onun sifət nahiyəsinə yumruq zərbəsi vurub. Bu zaman Vəlixan yerə yıxılıb, təqsirləndirilən şəxs isə onun yaxasından tutaraq iki dəfə başını yerə çırpıb, təpiklə bir neçə dəfə üz nahiyəsinə zərbələr endirib.
Vəlixan Həsənov beyinə qansızma səbəbindən xəstəxanada ölüb, Çingiz Əliyev isə saxlanılıb.
Təqsirləndirilən şəxs ifadəsində spirtli içki alduçəsi olduğunu deyib. Bununla bağlı 9 dəfə Sumqayıt şəhər narkoloji dispanserində müalicə də alıb. Şahid qismində dindirilmiş zərərçəkmiş şəxsin hüquqi varisi ifadəsində göstərib ki, Vəlixan onun doğma qardaşıdır. Onun sözlərinə görə, qardaşı tüfeyli həyat tərzi keçirirdi.
Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə Çingiz Əliyevə 9 il müddətinə azadlıqdan məhrumetmə cəzası kəsilib.
