Bir neçə il əvvəl yüksək akademik göstəriciləri ilə gündəmə gələn sumqayıtlı xanımın hazırda hansı sahədə çalışdığı bəlli olub.
Söhbət Sumqayıt şəhər 11 nömrəli məktəbin məzunu, daha sonra UNEC-in SABAH qruplarını 98.02 ÜOMG ilə fərqlənmə səviyyəsində bitirən Günel Rüstəmlidən gedir. O, 2023–2024-cü illərdə Dövlət Proqramının qalibi kimi Böyük Britaniyanın Exeter Universitetində "Social Data Science" ixtisası üzrə magistr təhsili alıb və təhsilini başa vurduqdan sonra Azərbaycana qayıdıb.
"Azərbaycan Universitetləri" adlı feysbuk səhifəsinin paylaşdığı məlumata görə, Günel Rüstəmli hazırda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyində data analitik vəzifəsində fəaliyyət göstərir.
Qeyd edək ki, o, bundan əvvəl Sumqayıt Texnologiyalar Parkında daxili auditor, "Kapital Bank"da isə biznes data analitiki kimi çalışıb.
