Bu gün Nəcəf bəy Vəzirov adına Lənkəran Dövlət Dram Teatrının aktyoru Əlibala Əsgərovun doğum günüdür. Bu barədə yanvarın 28-i Sumqayıt24 xəbər verir.
Əlibala Əfsər oğlu Əsgərov 28 yanvar 1955-ci ildə Sumqayıt şəhərində dünyaya göz açıb.
O, Azərbaycan Mədəniyyət və İncəsənət Universitetini bitirdikdən sonra N.B.Vəzirov adına Lənkəran Dövlət Dram Teatrında aktyor kimi fəaliyyətə başlayıb.
Ötən illər ərzində kollektivdə böyük hörmət və nüfuz qazanmış aktyor bu sənət ocağının səhnəsində 50-dən çox tamaşada müxtəlif xarakterli rollarda istedad və bacarığını nümayiş etdirib. Onlardan Sezar (A.Mədətov “Sezarın qətli”), Dursun (S.Rüstəm “Durna”), Murtuza (K.Nəzirli “Şeytan işığı”), Vəli Qulamoviç (Hidayət “Məni qınamayın”), Fərzəli (Y.Əzimzadə “Nəsrəddin”), Şaban (M.Məmmədov “Əcnəbi kürəkən”) və digər obrazlar bu aktyorun məhsuldar yaradıcılığının parlaq nümunələrindəndir.
Ə.Əsgərov, həmçinin “Durnalar qayıdanda”, “Qəzan mübarək, Paşam”, “Susmuş vicdan”, “Sevginin göz yaşı”, “Əli və Nino”, “Hörümçək toru” və digər bədii və televiziya filmlərində obrazlar yaradıb.
