Bu gün futbolçumuz Araz Abdullayevin doğum günüdür. Onun 30 yaşı tamam olur.
Araz Abdullayev 1992-ci il 18 aprel tarixində anadan olub. Gənc yaşlarında “Neftçi” klubunun akademiyasında futbolla məşğul olub. Daha sonra komandanın əvəzedici heyətində oynayıb. 5 oktyabr 2008-ci il tarixində Araz Abdullayev “Neftçi” klubunun əsas heyətində debüt etməklə peşəkar karyerasına başlayıb.
2011-ci ilin yanvar ayında Araz Abdullayev “Everton” klubu ilə 3 illik müqavilə bağlayıb. Müqavilə ilə “Everton”-a məxsus olan Abdullayev, daha sonra, 2012-ci ildə Yunanıstan liqasında çıxış edən “Panionios” klubuna icarəyə verilib. Yunanıstan Superliqasında 8 oyun keçirən Araz, icarəni bitirdikdən sonra “Everton” klubu ilə müqaviləsini bitirir.
Futbolçu 13 fevral 2022-ci il tarixində “Sumqayıt” FK-nın tərkibində ilk oyununu keçirib. 78 nömrəli forma ilə çıxış edən idmançı ilə klub 6 ay + 2 illik şərti müqavilə imzalayıb.
Araz Azərbaycan çempionatının və Azərbaycan kubokunun qalibidir.
