Bu gün Azərbaycanın Milli Qəhrəmanı, şəhid general-mayor Polad Həşimovun doğum günüdür. Onun 47 yaşı tamam olacaqdı.
Polad İsrayıl oğlu Həşimov 1975-ci il yanvarın 2-də Qəbələ rayonunun Vəndam kəndində anadan olub. O, ailəsi ilə birgə Sumqayıt şəhərinə köçüb. 1992-ci ildə Sumqayıt şəhər 34 nömrəli tam orta məktəbi bitirib. Daha sonra 1995-ci ildə Heydər Əliyev adına Ali Hərbi Məktəbdən məzun olub.
Həşimov 2016-cı ilin aprel döyüşlərində iştirak edib və yaralanıb. O, 2019-cu il iyunun 25-də general-mayor ali hərbi rütbəsini alıb. Daha sonra Azərbaycan Silahlı Qüvvələrinin 3-cü Ordu Korpusunun Qərargah rəisi təyin olunub.
General-mayor 2020-ci il 14 iyul tarixində Tovuz istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən şəhidlik zirvəsinə ucalıb. O, 15 iyul tarixində II Fəxri Xiyabanda, polkovnik İlqar Mirzəyev ilə yanaşı dəfn olunub.
Həşimovun Vətənə əmanət iki oğul və bir qız övladı qalıb.
Prezidentin sərəncamı ilə Polad Həşimova 9 dekabr 2020-ci il tarixində Azərbaycanın Milli Qəhrəmanı adı verilib.
