Polad İsrayıl oğlu Həşimov 1975-ci il yanvarın 2-də Qəbələ rayonunun Vəndam kəndində anadan olub. 1976-cı ildə Həşimovlar ailəsi Sumqayıt şəhərinə köçüb. O, Azərbaycan Silahlı Qüvvələrinin 3-cü Ordu Korpusunun komandir müavini - Qərargah rəisi olub.
Həşimov 2016-cı ilin aprel döyüşlərində iştirak edib və yaralanıb. Bundan sonra ona vaxtından əvvəl general rütbəsi verilib.
General-mayor P. Həşimov 2020-ci il iyulun 14-də Tovuz istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən qəhrəmancasına şəhid olub. General iyulun 15-də 2-ci Fəxri Xiyabanda dəfn olunub.
Azərbaycanın ərazi bütövlüyünün bərpa edilməsində xüsusi xidmətlərinə və döyüş tapşırıqlarını yerinə yetirən zaman göstərdiyi igidliyə görə Prezident İlham Əliyevin 9 dekabr 2020-ci il tarixli sərəncamı ilə ona Azərbaycanın Milli Qəhrəmanı adı verilib.
Polad Həşimovun Davud və Teymur adında oğulları, Aybəniz adında qızı yadigar qalıb.
