Bu gün Azərbaycan Respublikasının Əməkdar Artisti və Dağıstan Respublikasının Xalq Artisti Ədalət Şükürovun doğum günüdür.
Ədalət Şükürov 1966-cı il aprelin 22-də Sumqayıt şəhərində anadan olub. Orta məktəbi bitirdikdən sonra hərbi xidmətə yollanıb. Hərbi xidməti başa vurub geri döndükdən sonra, 1987-ci ildə Sankt-Peterburq Mədəniyyət Universitetinin "Kütləvi tədbirlər rejissoru" fakültəsinə daxil olub.
Ali təhsilini başa vurduqdan sonra Ədalət Şükürov Sankt-Peterburqun 5-ci kanalında yayımlanan "Adamovo yabloko" verilişində rejissor kimi fəaliyyət göstərib. Bir müddət sonra Luqa şəhərində baş rejissor kimi çalışıb və kütləvi tədbirlər keçirməyə başlayıb. Daha sonra mahnı bəstələməyə və şeirlər yazmağa başlayıb. Musiqi və mətnləri aranjeman edərək ifa da edib.
İlk ifa etdiyi mahnı "Nişan üzüyü" olub. İlk dəfə AzTV 1-də də məhz həmin mahnı ilə çıxış edib. Səyahət etməyi sevən Ədalət dünyanın 50-yə yaxın ölkəsində olub. "Salsa Viva" rəqs məktəbini bitirib. Dizaynerliklə də məşğul olan Ədalət Şükürov, zaman-zaman rəssamlıqla da məşğul olur.
