Bu gün “Qartal” ləqəbli şuşa fatehi Ramiz Cəfərovun mövlud günüdür

Ramiz Sübhan oğlu Cəfərov dekabrın 10-da Makeyevka şəhərində anadan olub.

1981-1985-ci illərdə Sumqayıt şəhərində, 17 nömrəli tam orta məktəbdə, 1985-1989-cu illərdə Sumqayıt şəhərində, 11 nömrəli tam orta məktəbdə, 1989-1992-ci illərdə isə Cəmşid Naxçıvanski adına Hərbi Liseydə təhsil alıb. 1992-1996-cı illərdə V. F. Marqelov adına "Suvorov" ordenli Ryazan Qvardiya Ali Hava-Desant Komandanlığı Məktəbində ali hərbi təhsil alıb. Alman, ingilis və rus dillərini bilirdi.

Dostları "Qartal" ləqəbi vermişdilər. Ryazanda oxuyanda paraşütlə tullanıblar. Ramizin paraşütünün ipləri dolaşıb, həmin vaxt özünü itirməyib, elə göydəcə vəziyyətdən çıxıb. Qoçaqlığına görə ona belə ad vermişdilər.

2020-ci il sentyabrın 27-də başlanan Vətən müharibəsində Azərbaycan Xüsusi Təyinatlı Qüvvələrinin polkovnik-leytenantı Cəfərov tabeliyində olan hərbi qulluqçularla Cəbrayıl və Şuşa rayonları istiqamətlərində gedən döyüşlərdə savaşıb. Ümumi olaraq 40 gün ərzində bir sıra yaşayış məntəqələrinin, həmçinin əlverişli mövqelərin və strateji nöqtələrin azad edilməsi uğrunda gedən döyüşlərdə iştirak edib. Noyabrın 6-da Şuşa istiqamətində şəhid olub. 2-ci Şəhidlər xiyabanında dəfn olunub.

Ramiz Cəfərov ailəli idi. Rəbiqə, Nigar, Nərgiz, Nurlana adında dörd qızı və Nurlan adında oğlu yadigar qaldılar.

Ölümündən sonra:

• “Vətən Müharibəsi Qəhrəmanı”;


• “Vətən uğrunda”;


• “Cəbrayılın azad olunmasına görə”;


• “Şuşanın azad olunmasına görə”;


• “Füzulinin azad olunmasına görə”;


• “Xocavəndin azad olunmasına görə” medalları ilə təltif edilib.