Mirsəfa Mircəlil oğlu Rzayev 19 fevral 1995-ci ildə Sumqayıt şəhərində anadan olub.
Mirsəfanın atası Birinci Qarabağ Müharibəsinin iştirakçısı olub. O, 2010-cu ildə vəfat edib.
Mirsəfa Rzayev 2013-cü ildə Bakıdakı Abdulla Şaiq adına 54 saylı tam orta məktəbi bitirərək Azərbaycan Dövlət Dəniz Akademiyasına qəbul olub. Orada “Nəqliyyat servisi” ixtisası üzrə təhsil alıb. 2017-ci idə Akademiyanı bitirdikdən sonra o, həqiqi hərbi xidmətə çağırılıb.
Hərbi xidmətdən qayıtdıqdan sonra Mirsəfa Bakı Beynəlxalq Dəniz Ticarət Limanında dispetçer işləməyə başlayıb. Kollektivdə səmimi, işgüzar və bacarıqlı insan kimi tanınırdı.
27 sentyabr 2020-ci ildə başlayan Vətən Müharibəsinin ilk günündən döyüşlərə qatılan Mirsəfa bir çox uğurlu döyüşün iştirakçısı olub. Hətta ən çətin döyüşlərə də gülə-gülə, mahnı oxuyaraq gedirmiş.
Mirsəfa Rzayev 26 oktyabrda Füzuli uğrunda gedən döyüşlərdə raket zərbəsi nəticəsində aldığı ağır kəllə-beyin yarasından şəhid olub.
Ölumundən sonra şəhidimiz “Vətən uğrunda” və “Füzulinin azad olunmasına görə” medalları ilə təltif edilib.
