Bu gün Vətən uğrunda canından keçən qəhrəmanımız – şəhid kapitan Hətəmxan Quliyevin doğum günüdür.
1990-cı il martın 24-də Sumqayıt şəhərində dünyaya göz açan Hətəmxan Quliyev əslən Cəbrayıl rayonundan idi. Kiçik yaşlarından hərb sənətinə maraq göstərən Hətəmxan əvvəl Sumqayıtda 4 nömrəli məktəbdə təhsil aldı, daha sonra Cəmşid Naxçıvanski adına Hərbi Lisey və Heydər Əliyev adına Azərbaycan Ali Hərbi Məktəbində oxuyaraq peşəkar zabit kimi formalaşdı.
2012-ci ildən etibarən Azərbaycan Silahlı Qüvvələrinin sıralarında xidmət edən kapitan Hətəmxan Quliyev həm 2016-cı ilin Aprel döyüşlərində, həm də Vətən müharibəsi zamanı ön cəbhədə vuruşdu. Xüsusilə Suqovuşan uğrunda gedən döyüşlərdə göstərdiyi igidlik onun adını tarixə yazdı.
29 sentyabr 2020-ci ildə döyüş tapşırığını yerinə yetirərkən şəhidlik zirvəsinə ucalan Hətəmxan Quliyev bu gün də xalqımızın qəlbində yaşayır. O, II Şəhidlər Xiyabanında torpağa tapşırılıb.
Qəhrəman zabit ölümündən sonra Prezident İlham Əliyevin Sərəncamları ilə "Vətən uğrunda", "Suqovuşanın azad olunmasına görə", "Hərbi xidmətlərə görə" medalları və 3-cü dərəcəli "Rəşadət" ordeni ilə təltif olunub.
