Bəzi qəribə əlamətlər telefonun sındırılması və dinlənilməsi barədə siqnal verə bilər.
Bizim.Media xəbər verir ki, bu barədə Rusiya Texnologiya Universitetinin Etibarlı Süni İntellekt laboratoriyasının müdiri Yuri Silayev məlumat verib.
Moskva Şəhər Xəbərləri Agentliyinə müsahibəsində Silayev bildirib ki, telefonun dinlənilməsi və ya sındırılması ilə bağlı bəzi narahatedici əlamətlər var.
Başlıca əlamətlər bunlardır:
Sürətli batareya boşalması. Xüsusilə telefon aktiv istifadə olunmadığı halda bu baş verirsə, diqqət yetirmək lazımdır.
Fon rejimində internet trafikinin artması və ya mobil şəbəkənin qeyri-adi aktivliyi. Bu, telefon sahibinin xəbəri olmadan məlumatların ötürülməsinə işarə edə bilər.
“Gadget”in qəribə davranışı və zənglər zamanı yad səslər.
Məsələn, öz-özünə yenidən başlatma, donma, ekranın gözlənilmədən işıqlanması zərərli proqram təminatının işarəsi ola bilər.
Zənglər zamanı yad səslər, əks-səda və ya xışıltılar da diqqətəlayiqdir, baxmayaraq ki, bu əlamətlər hər zaman dinlənilməni göstərmir.
Naməlum SMS və MMS mesajları. Qeyri-adi işarələr və ya linklər ehtiva edən mesajlar da hücumun göstəricisi ola bilər.
Telefonun həddindən artıq qızması. Bu, həm zərərli proqram təminatı, həm köhnəlmiş batareya, həm də fon prosesləri ilə əlaqədar ola bilər. Əgər telefon istifadə olunmadığı halda belə qızırsa, bu dərin yoxlama üçün siqnaldır.
Yad faylların və ya proqramların peyda olması.
Xüsusilə .apk faylları, gizli arxivlər və ya istifadəçi tərəfindən quraşdırılmayan tətbiqlər şübhə doğurmalıdır.
Sistem proqramlarının şübhəli icazələr tələb etməsi də telefonun təhlükəsizliyinin pozulduğunu göstərə bilər.
Nə etməli?
Quraşdırılmış tətbiqlərin siyahısını yoxlayın və tanımadığınız tətbiqləri silin.
Əməliyyat sistemini ən son versiyaya yeniləyin.
Telefonu antivirusla skan edin.
Bütün tətbiqlərin icazələrini gözdən keçirin – mikrofon, kamera və geolokasiya yalnız etibarlı tətbiqlərdə aktiv olmalıdır.
Əgər vəziyyət dəyişmirsə, fabrik parametrlərinə qaytarma da çıxış yolu ola bilər (öncədən vacib məlumatları saxlayın).
Əgər məqsədli izləmə şübhəsi varsa, kiber təhlükəsizlik mütəxəssislərinə müraciət edin.
Ekspertin sözlərinə görə, bu əlamətlərin bir çoxu bəzən sadəcə sistem nasazlığı səbəbindən də baş verə bilər. Lakin diqqətli olmaqda fayda var.
