Hər il Bakıya olan insan axınında artım müşahidə edilir. 2025-ci ilin statistikasına görə, Bakıda əhalinin sayı 2 milyon 351 min 300 nəfər təşkil edib.
İldən-ilə artan əhali sayı ölkədə nəqliyyat vasitələrinin də artmasına səbəb olur. Bu isə Bakının əsas sosial problemlərindən biri olan tıxacların yaranmasına gətirib çıxarır. Demək olar ki, hər gün paytaxtın müxtəlif yerlərində, xüsusilə səhər saat 08:30 və axşamüstü 18:30 radələrində nəqliyyat sıxlığı müşahidə olunur.
Bu günlərdən etibarən tətilə çıxan paytaxt sakinləri kütləvi şəkildə Novruz bayramını qeyd etmək üçün rayonlara üz tutacaqlar. Bu isə paytaxt yollarında tıxacların yaranmasına səbəb olacaq.
Nəqliyyat məsələləri üzrə ekspert Aslan Əsədov patrul.az-a açıqlamasında 17 və 18 mart tarixlərində Bakı şəhərinin hansı ərazilərində sıxlıq yaranacağını proqnozlaşdırıb.
O, tıxacdan yayınmaq üçün alternativ yollardan istifadə etməyi tövsiyə edib:
"Alternativ yollar kimi Sumqayıt istiqamətində Böyükşor-Pirşağı-Sumqayıt marşrutunu seçmək məqsədəuyğundur. 9 km artıq yol getmək tıxacda qalmaqdan daha yaxşıdır. Xırdalan, Masazır və Sulutəpə istiqamətinə getmək üçün Azadlıq prospekti-Binəqədi yolundan istifadə etmək olar. Cənub istiqaməti üzrə isə Bakı dairəvi yolu ilə Biləcəri, Yasamal və Badamdar ərazilərindən istifadə etmək məqsədəuyğundur.
Qarşıdan gələn Ramazan və Novruz bayramlarınız mübarək".
