Mütəxəssislər həyəcan təbili çalırlar ki, uşaqlar arasında sürətlə yayılan sürpriz oyuncaqlar qumar aludəçiliyinə yol aça bilər.
Ekspertlərin fikrincə, ənənəvi gəlinciklər uşaqlar üçün daha sağlam hesab olunur.
Sumqayit24.az İHA-ya istinadən xəbər verir ki, türkiyəli psixoloq Ahmet Erdem oyuncaqlarla bağlı xəbərdarlıq edib.
Bildirilib ki, uşaqlar sürpriz oyuncaqlardan hər birinin içində nə olacağını bilmirlər. Bu, azyaşlıları istədikləri sürprizi tapana qədər davamlı olaraq yeni oyuncaq almağa təşviq edir. Belə olduqda uşaqlar oyuncağın özündən çox, satınalma anındakı həyəcandan asılı hala gəlir və həmin həyəcanı təkrar-təkrar yaşamaq istəyirlər.
"Uşaqlar artıq oyuncağın özü ilə deyil, onu alarkən hiss etdikləri emosiya ilə maraqlanırlar. Bu, zehində qumara bənzər bir mexanizm yaradır", - psixoloq bildirib.
O, valideynləri uşaqlar üçün oyuncaq seçimində daha diqqətli olmağa çağırıb.
