Sumqayıtda fəaliyyət göstərən tibb müəssisələrindən biri acınacaqlı vəziyyətdədir.
Söhbət Sumqayıt Tibb Mərkəzinin tabeliyində fəaliyyət göstərən 7 nömrəli Ailə Sağlamlıq Mərkəzindən gedir. Tibb müəssisəsi Hacı Zeynalabdin Tağıyev qəsəbəsində yerləşir.
Sumqayit24.az-a daxil olan şikayətə görə, tibb ocağının fasadı köhnəlib, suvaqlar tökülüb və görünüşü ilə daha çox ucqar kənd xəstəxanasını xatırladır.
Müraciətdə qeyd olunur ki, bəzi pəncərələrin şüşələri qırıq vəziyyətdədir. Divarlarda isə qəlpə və ya güllə izlərini xatırladan deşiklər və çatlar müşahidə olunur. Bu isə tibb müəssisəsinin uzun müddətdir əsaslı təmir görmədiyini göstərir.
Fotolardan da aydın görünür ki, binanın daxili vəziyyəti də ürəkaçan deyil. Otaqlarda tavan, döşəmələr köhnəlib.
Şikayətçinin sözlərinə əsasən, belə bir şəraitdə insanların tibbi xidmət alması həm narahatlıq yaradır, həm də müasir səhiyyə standartlarına uyğun görünmür.
O, aidiyyəti qurumların məsələyə diqqət yetirməsini və tibb müəssisəsində əsaslı təmir işlərinin aparılmasını tələb edir.
