Ceyranbatan su anbarı Sumqayıt və Bakının suya tələbatının kəskin artması ilə əlaqədar 1955-ci ildə yaradılıb. İçməli su mənbəyi kimi istifadə edilən Ceyranbatan su anbarının təhlükəsizliyini təmin etmək məqsədilə 1960-cı ildə onun ətrafında üçzolaqlı sanitar-mühafizə zonası yaradılıb. 2001-ci ildən burada təhlükəsizlik tədbirləri gücləndirilib və anbarın mühafizə zonası hasara alınıb. Su anbarının ekoloji vəziyyətini qorumaq üçün hazırda anbarın ətrafında meşə zolaqları salınıb. Ceyranbatan anbarında birinci və ikinci mərhələlərdə su şəffaflaşdırılır, üçüncü mərhələdə isə durulduculardan istifadə etməklə süzgəclər vasitəsilə təmizlənərək içməli hala gətirilir. Təəssüflər olsun ki, anbara çirkab və qrunt sularının axıdılması son vaxtlar müzakirə edilməkdədir. Su anbarının içməli su ehtiyatlarına kənar suların qarışması faciəvi nəticələrə gətirib çıxara bilər. Ona görə də suların anbara axıdılmasının qarşısı alınmalıdır.
Bunu Azertag.az-a açıqlamasında "Səma və Ekososial-İqtisadi İnkişafa Yardım" İctimai Birliyinin sədri İradə Həsənova deyib.
“Hazırda iqlim dəyişikliyi və insan faktoru ölkəmizdəki çayların çirklənməsinə səbəb olur. Bir çox şəhərlərdə, rayonlarda təmizləyici qurğuların olmaması Ceyranbatan su anbarına axan Samur çayı və onun qollarının tullantı suları ilə daha da çirklənməsinə səbəb olur. Bir yandan da hazırda həmin su anbarı kanalizasiya suları ilə çirkləndirilməkdədir. Bu isə öz növbəsində müxtəlif xəstəliklərə yol aça, özünü dəri, qulaq, göz, həzm, tənəffüs və nevroloji sistemlərdə çox müxtəlif infeksiyalarla göstərə bilər. Bir anlığa içməli sudan yayılan epidemiyaları göz önünə gətirsək, vəziyyətin nəzarətdən çıxa, hansı fəsadlar və faciələrlə nəticələnə biləcəyini təsəvvür edə bilərik. Ona görə də bu istiqamətdə tədbirlərin görülməsi zəruri və vacibdir. Bunun üçün də bununla bağlı həm maarifləndirmə işləri, həm də monitorinqlər aparılmalıdır", - deyə İ.Həsənova qeyd edib.
