Sumqayıt şəhəri, Corat qəsəbəsinin dəniz sahilində ziddiyyətli vəziyyət yaranıb.
Belə ki, cari yayın əvvəlində ərazidə yeni ictimai çimərlik istifadəyə verilib. Burada vətəndaşların istirahəti üçün söhbətgahlar, günəş çətirləri, avtomobil dayanacağı, uşaq və idman meydançaları, duş kabinələri, sanitar qovşaqlar və digər zəruri infrastruktur yaradılıb.
Lakin Sumqayit24.az-a müraciət edən sakinlərin sözlərinə görə, sözügedən yerin düz yanında Fövqəladə Hallar Nazirliyinin (FHN) üzərində "Çimərlik ərazisi" yazılan məlumatlandırıcı lövhəsi var. Burada diqqət çəkən məqamlardan biri isə lövhədəki ox işarəsinin dənizdə çimmək istəyənlərə tamamilə başqa istiqamət göstərməsidir.
Sakinlər bunun nə ilə bağlı olduğunu anlaya bilmirlər. Onlar həmin ərazidə üzməyin mümkün olub-olmaması ilə bağlı tərəddüd yaşadıqlarını deyirlər. Bəziləri isə lövhədə göstərilən istiqamətin səbəbini və ərazidə hər hansı təhlükənin olub-olmadığını soruşurlar.
Məsələ ilə bağlı müvafiq quruma sorğu göndərdik. Sorğuya cavab olaraq bildirilib ki, Fövqaladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin Sularda Xilasetmə Məntəqələrinin dislokasiya ərazilərində yerləşən bütün çimərliklərdə zəruri təhlükəsizlik tədbirləri Xidmət tərəfindən həyata keçirilir:
"Xidmətin dislokasiya ərazilərindən kənarda yerləşən çimərliklərdə isə sularda təhlükəsizlik tədbirləri aidiyyəti olaraq çimərlik sahibləri, icəradarlar, çimərlik operatorları tərfindən təmin edilməlidir".
