Sumqayıtda küçələrdən birində antisanitar vəziyyət hökm sürür.
Sumqayit24.az-a bu barədə 11-ci mikrorayon, Çerkassı küçəsinin sakinləri məlumat veriblər.
Vətəndaşların sözlərinə görə, zibil qutuları yaşadıqları ərazidən uzaqda yerləşdiyi üçün məişət tullantıları küçədə müəyyən hissəyə qoyulur və daha sonra zibil maşınları tərəfindən ərazidən daşınır. Lakin sakinlər iddia edirlər ki, son aylarda tullantıların daşınmasında ciddi gecikmələr yaranıb.
"Son aylarda ərazidə antisanitar vəziyyət hökm sürür, düzgün işləmirlər. Əvvəl həftənin 2-ci və 5-ci günləri zibil maşını gəlirdi. İndi isə bəzən iki, hətta üç həftədən bir gəlirlər. Deyirlər maşın yoxdur, işçi yoxdur. Amma illik ödənişlər yığılır. Hətta deyirlər ki, çalışın, özünüz aparıb atın. Onda qapı-qapı düşüb pul da yığılmasın. Məcbur qalırıq, zibili maşına yığıb aparıb özümüz atırıq", - deyə sakinlər narazılıqlarını bildiriblər.
Sumqayit24.az-a Sumqayıt Təmizlik Departamentindən bildirilib ki, 11-ci mikrorayon ərazisində və digər mikrorayonlarda tullantı qutuları mövcuddur. Qeyd olunub ki, tullantılar mütəmadi olaraq ərazidən daşınır:
"Əraziyə baxış keçirilib lazımi tədbirlər görüləcək".
