Sumqayıtın yaşayış massivlərindən birində zibil problemi ciddi narahatlıq doğurur.
Sumqayit24.az-a bu barədə Yaşıl Dərə yaşayış massivinin sakinləri məlumat veriblər.
Vətəndaşların sözlərinə görə, ərazidə zibil qutuları yoxdur. Bu səbəbdən bəzi sakinlər məişət tullantılarını yol kənarlarına atır, bəzi hallarda isə yandırırlar.
"Hiss və üfunət qoxusundan ərazidən keçmək olmur. Ərazidə zibil qabı yoxdur, elə bil Yaşıl Dərədə insan yaşamır. Sakinlər öz ciblərindən pul ayıraraq maşın tuturlar ki, heç olmasa həftədə bir dəfə məhəllələrdəki zibilləri təmizləsinlər. Bəzi sakinlər isə tullantıları yol kənarına atırlar. Bir neçə ay əvvəl kimsə zibilləri yandırmışdı. Yanğın genişləndi, qarşısını almaq mümkün olmadı. Buna baxmayaraq, problemin həlli ilə bağlı hələ də tədbir görülməyib", – deyə sakin bildirib.
Şikayətçilər aidiyyəti qurumlardan yaşayış massivində zibil konteynerlərinin yerləşdirilməsini və ərazinin mütəmadi təmizlənməsini istəyirlər. Həmçinin sakinlərə məişət tullantılarını ətrafa atmamaq və yandırmamağı məsləhət görürlər.
