Bu gün şəhid Novruz İnqilab oğlu Məmmədovun doğum günüdür.
1991-ci il martın 20-də Sumqayıt şəhərində dünyaya gələn Novruz Məmmədov qısa, lakin mənalı və şərəfli bir ömür yaşadı. İnqilab və Şəfiqə Məmmədovaların ailəsində böyüyən Novruz, Hacı Zeynalabdin Tağıyev qəsəbəsində yerləşən 6 saylı tam orta məktəbdə təhsil alıb.
Hərbi xidmətə çağırıldıqdan sonra Vətənə bağlılığını yalnız borc kimi deyil, həyat amalına çevirən Novruz xidmətini başa vurduqdan sonra da ordudan ayrılmadı. Müddətdən artıq hərbi qulluqçu kimi sürücü vəzifəsində xidmətini davam etdirərək, hər zaman ön cəbhəyə hazır oldu.
2020-ci il sentyabrın 27-də başlayan Vətən müharibəsi onun həyatının dönüş nöqtəsinə çevrildi. Azərbaycan Ordusunun igid əsgəri kimi döyüşlərə qatılan Novruz, kəşfiyyatçı və snayper olaraq ən çətin tapşırıqlarda iştirak etdi. Xüsusilə Füzuli istiqamətində gedən ağır döyüşlərdə böyük şücaət göstərdi.
Döyüş yoldaşlarının xatirələrində Novruz təkcə igid döyüşçü deyil, həm də əsl dost kimi yaşayır. O, döyüş zamanı silahdaşı Tariyeli xilas etdi. Lakin taleyin acı yazısı ilə cəmi üç gün sonra – 24 oktyabr 2020-ci ildə Füzuli istiqamətində döyüş tapşırığını yerinə yetirərkən qəhrəmancasına şəhid oldu.
Onun göstərdiyi qəhrəmanlıq dövlət tərəfindən də yüksək qiymətləndirildi. Azərbaycan Prezidenti İlham Əliyevin sərəncamları ilə Novruz Məmmədov ölümündən sonra "Vətən uğrunda", "Laçının azad olunmasına görə", "Füzulinin azad olunmasına görə" və "Xocavəndin azad olunmasına görə" medalları ilə təltif edildi.
Novruz Məmmədov dostcanlılığı, qorxmazlığı və mərdliyi ilə onu tanıyan hər kəsin yaddaşında silinməz iz qoydu. O, yalnız ailəsinin deyil, bütün Azərbaycanın fəxrinə çevrildi.
