Sumqayıt Dövlət Universitetində (SDU) “Enactus Azərbaycan” proqramının infosessiyası baş tutub. Bu haqda 27 dekabr tarixində Sumqayıt24 xəbər verir.
Beynəlxalq əlaqələr üzrə prorektor, dosent Qafar Atayev universitetin “Enactus” komandasının fəaliyyətindən, layihələrdən, proqramın əhəmiyyətindən danışıb. O əlavə edib ki, “Enactus” gələcək nəsil təşəbbüskar liderləri və sosial yenilikçiləri yetişdirən ən böyük təcrübə öyrənmə platformasıdır. Burada gənclərə nəzəri biliklərini praktikada tətbiq etməyə, biznes, təhsil və sosial layihələrin həyata keçirilməsinə şərait yaradılır və azad sahibkarlıq təbliğ edilir.
“Enactus” komandasının kapitanı Şəfa İsayeva bildirib ki, 34 ölkədə minlərlə tələbəni birləşdirən proqram ölkəmizdə Gənclər Fondunun dəstəyi ilə həyata keçirilir. Sonra SDU-nun magistrantı Seymur Talıbov “Handmade store” layihəsinin təqdimatını edib.
Proqramın ölkə üzrə proqram direktoru Rəşad Zeynalov komandaların formalaşdırılması, hazırlanacaq layihələrin meyarları və hər il təşkil olunan Milli yarış və Dünya Kuboku barədə söz açıb.
İnfosessiya sual-cavab ilə yekunlaşıb.
