Sumqayıtda “Baş vermiş fövqəladə halların nəticələrinin aradan qaldırılması zamanı psixoloji xidmətlərin təşkili” mövzusunda konfrans keçirilib. Sumqayıt24 bu haqda 3 noyabr tarixində xəbər verir.
Tədbir Fövqəladə Hallar Nazirliyi Sumqayıt Regional Mərkəzi tərəfindən Sumqayıt şəhər Heydər Əliyev Mərkəzində təşkil olunub. Konfransda Sumqayıt Regional Mərkəzinin rəisi polkovnik Vaqif Fətullayev, İcra Hakimiyyəti başçısının müavini Fərid Ələkbərov, FHN Fövqəladə halların nəticələrinin aradan qaldırılması işinin təşkili Baş idarəsinin rəis müavini polkovnik-leytenant Elnar Məmmədov, FHN-in yerli qurumlarının, şəhərin idarə, müəssisə və təşkilatlarının rəhbərləri, o cümlədən Abşeron-Xızı Regional Təhsil İdarəsi və Sumqayıt Tibb Mərkəzinin tabeliyində olan müəssisələrdən 148 nəfər psixoloq iştirak edib.
Əvvəlcə iştirakçılar ulu öndər Heydər Əliyevin abidəsi önünə gül dəstələri düzüb, Heydər Əliyev Mərkəzində onun həyat və fəaliyyətindən bəhs edən eksponatlarla tanış olublar.
Konfransı giriş sözü ilə açan polkovnik Vaqif Fətullayev fövqəladə hadisələr zamanı psixoloqların zərərçəkmişlərə ilkin psixoloji yardımın göstərilməsinin əhəmiyyətini vurğulayıb. Təhsil və səhiyyə müəssisələrinin və FHN-in psixoloqlarının qarşılıqlı fəaliyyət göstərmələrinin səmərəli olduğu bildirilib.
Sonra fövqəladə hadisələr zamanı zərərçəkmiş şəxslərdə kəskin stres əlamətlərinin azaldılması üçün ilkin psixoloji yardımın göstərilmə qaydalarından bəhs edilib, müxtəlif xarakterli qəza-xilasetmə işləri zamanı zərərçəkmişlərə və onların yaxınlarına mənəvi dəstəyin göstərilməsinin vacibliyindən söz açılıb.
Fövqəladə Hallar Nazirliyinin Aparatı və qurumlarından dəvət olunan ixtisaslaşmış psixoloqların “Fövqəladə hadisələr zamanı ilkin psixoloji yardımın göstərilməsi. Kəskin stres reaksiyaları”, “Fövqəladə hallar zamanı kütlə davranışının psixoloji xüsusiyyətləri, neqativ kütlə reaksiyaları. Kütlənin növləri və idarə edilmə qaydaları”, “İntihar və intihara cəhd hadisələrinin qarşısının alınması” və “Psixoloji reabilitasiya və özünü idarəetmə qaydaları. Təşviş pozuntuları zamanı psixoloji yardımın xüsusiyyətləri” mövzularında çıxışları olub.
Tədbir zamanı FHN-in fəaliyyəti haqqında videoslayd izlənilib. Sonda Sumqayıt Regional Mərkəzinin kurslarında iştirak edən psixoloqlara şəhadətnamələr verilib.
