Sumqayıt Musiqi Kollecinin məzunu beynəlxalq müsabiqənin ən yüksək mükafatını qazanıb.
AZƏRTAC-ın məlumatına görə, Rəşid Behbudov adına Azərbaycan Dövlət Mahnı Teatrında "Talanttar Alemi" çoxjanrlı beynəlxalq yaradıcılıq müsabiqəsi keçirilib.
Azərbaycan və Qazaxıstandan iştirakçıların olduğu müsabiqə "Xoreoqrafiya. Teatr sənəti", "İnstrumental ifaçılıq – fortepiano, dombra, skripka, tar, fleyta, qarmon", "Xor dirijorluğu. Estrada vokalı" və "Təsviri və dekorativ-tətbiqi sənət" nominasiyalarını əhatə edib. Münsiflər heyətində hər iki ölkədən tanınmış sənətçi-mütəxəssislər yer alıblar.
Tarzən Fərid İmranlı "İnstrumental ifaçılıq" nominasiyasında uğurla çıxış edərək Qran-priyə layiq görülüb. O, müsabiqədə Həsən Rzayevin "Çahargah" rapsodiyasını səsləndirib.
Gənc tarzəni fortepianoda konsertmeyster Sevinc Süleymanova müşayiət edib.
Qeyd edək ki, müsabiqənin təşkilatçısı "Talant Studio" yaradıcılıq mərkəzinin təsisçisi Bakıtqul Delmanovadır (Qazaxıstan).
