Günəşin səthindən böyük ölçülü protuberans qopub və əmələ gələn plazma kütləsinin şimal qütbü istiqamətində irəlilədiyi müəyyənləşib.
Sumqayit24.az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası rəsmi "Telegram" kanalında açıqlama yayıb.
Məlumata görə, Günəş ətrafında yaranmış plazma strukturunun ölçüsü təxminən 1 milyon kilometrə çatır. Qeyd edilib ki, bu cür iri protuberanslar kosmik hava baxımından ən riskli hadisələr sırasında sayılsa da, onların Yerə birbaşa təsiri çox nadir hallarda baş verir.
Müşahidələr zamanı obyektin Günəşdən planetlərin orbit müstəvisinə perpendikulyar, yəni demək olar ki, şaquli istiqamətdə yuxarı qalxdığı bildirilib.
Laboratoriya nümayəndələri oxşar hadisənin sonuncu dəfə 2025-ci ilin noyabrında qeydə alındığını xatırladıblar və hazırkı trayektoriyaya əsasən, bu plazma kütləsinin Yer üçün təhlükə yaratmadığını vurğulayıblar.
