Bildiyimiz kimi, Sumqayıt şəhərində yeni elektrik avtobuslarının istehsalı ilə məşğul olan “Azerbaijan Energy Automotive Factory” MMC fəaliyyət göstərir. Sözügedən müəssisə Sumqayıt Kimya Sənaye Parkının rezidentidir.
Burada yığılan 12 metrlik, 82 sərnişin tutumuna malik və bir dəfə şarjla 350 kilometr məsafə qət edə bilən ilk avtobus artıq “BakuBus” MMC-yə təqdim olunub. Bu ilin sonunadək daha 300 avtobusun istehsalı və müxtəlif regionlara göndərilməsi planlaşdırılır.
Lakin bu fonda maraqlı mənzərə yaranır: Sumqayıt sakinlərinin istifadəsinə Gəncədə, eləcə də qonşu ölkələrdə illərlə istismar olunan köhnə avtobuslar verilir. Üstəlik, 16, 17 və 18 nömrəli marşrut xətlərində vəziyyət daha da acınacaqlıdır — bu xətlərdə hələ də ötən əsrdən qalma sınıq-salxaq avtobuslar hərəkət edir.
Bu yerdə isə atalar sözü yada düşür: “Hamını bəzər, özü lüt gəzər…”
