Hotel sahəsində işləmək istəyən Sumqayıt sakinləri üçün əla fürsət yaranıb. Sumqayıt24 bu haqda 5 iyul tarixində Oxu.az-a istinadən xəbər verir.
ATHEC Azərbaycan Turizm və Qonaqpərvərlik və “Barattson” Tədris Mərkəzləri Dövlət Məşğulluq Agentliyinin dəstəyi ilə - “barista”, “hotel xadiməsi” və “ofisiant” peşə ixtisasları üzrə qrupların toplanmasına start verir. Assosiasiyanın mütəxəssisləri tərəfindən həmin ixtisaslar üzrə tədris proqramlarının tətbiqi həyata keçiriləcək.
Təlim proqramları nəzəri biliklərlə yanaşı, usta nəzarətində istehsalat təcrübəsinin keçirilməsi komponentlərindən ibarətdir. Proqramı müvəffəqiyyətlə keçmiş şəxslər işlə təmin edilmə və özünüməşğulluq imkanları əldə edəcəklər. Bundan əlavə, müdavimlər təqaüd alacaq, zəruri tədris və təcrübə ləvazimatları ilə təmin ediləcək və sertifikatla fərqləndiriləcəklər.
Peşə hazırlığı kursuna cəlb olunmaq istəyən sumqayıtlıların, şəhər üzrə Əmək və Əhalinin Sosial Müdafiəsi Nazirliyinin DOST Mərkəzinə müraciət edərək işsiz kimi qeydiyyata düşmələri tövsiyə olunur.
Əlavə məlumatları həftənin I-V günləri, saat 11:00-17:00 arasında (012) 434-78-77 / (050) 661-00-75 telefon və “Whatsapp” vasitəsilə və yaxud [email protected] elektron poçt ünvanına yazaraq əldə etmək olar.
