İcra başçısı Zakir Fərəcov şəhid Adil İbrahimli adına 14 nömrəli məktəbdə olub. Sumqayıt24 bu haqda 25 fevral tarixində quruma istinadən xəbər verir.
Şəhər rəhbəri şəhidimizin büstü önünə tər gül dəstələri düzüb, onun adına açılan muzeyə baxış keçirib. Qeyd olunub ki, Vətən müharibəsi qəhrəmanı Adil İbrahimli 9 sentyabr 1992-ci ildə Sumqayıtda anadan olub. 1999-2008-ci illərdə Sumqayıt şəhər 14 nömrəli tam orta məktəbdə 9-cu sinfi bitirib. Sonra Cəmşid Naxçıvanski adına Hərbi Liseyə qəbul olub. 2011-ci ildə həmin liseyi bitirdikdən sonra Heydər Əliyev adına Azərbaycan Ali Hərbi Məktəbinə daxil olub. O, 2015-ci ildə Hərbi məktəbi bitirərək leytenant rütbəsini alıb. Sonra Təlim-Tədris Mərkəzində zabit kimi təkmilləşmə kursu keçərək Azərbaycan ordusunda xidmətə başlayıb. 2017-ci ildə XTQ-yə qəbul olan Adil orada fəaliyyət göstərdiyi zamanda Türkiyədə “Komando” kursunu fərqlənmə ilə bitirib. 44 günlük Vətən müharibəsində o, Murovdağ uğrunda gedən döyüşlərdə, Suqovuşan, Füzuli, Hadrut, Xocavənd, Şuşa döyüşlərində iştirak edib. Son tapşırığı Şuşada olub və elə orada da şücaət göstərib, yaralı olsa da, qəhrəmancasına vuruşub. Noyabrın 7-də Adil İbrahimli şəhidlik zirvəsinə yüksəlib.
