Sumqayıtda yaşayış binasının liftinin qəzalı vəziyyətdə olması ilə bağlı rəsmi qurum açıqlama verib. Bildirilir ki, yenilənmə prosesi aparılarkən sözügedən lift dəyişdiriləcək:
“Məlumat üçün bildirək ki, son illər şəhərdə lift təsərrüfatının maddi-texniki bazasının möhkəmləndirilməsi, əhalinin liftdən təhlükəsiz istifadə etməsinin təmin olunması məqsədilə istismar müddətini ötmüş 600-ə yaxın lift yenisi ilə əvəz olunub. Şəhərimizdə çox az sayda liftin yenilənməsinə ehtiyac var. Qeyd olunan lift yenilənməsi nəzərdə tutulmuş liftlərin siyahısına daxildir. Yenilənmə prosesi aparılarkən sözügedən lift də yenisi ilə əvəz olunacaq, - deyə Sumqayıt Şəhər İcra hakimiyyətindən əlavə edilib.
Qeyd edək ki, bu hal 9-cu mikrorayonda yerləşən 25-ci binada müşahidə olunur. Liftin iç hissəsi köhnəlib, döşəməsi və divarlarında bəzi yerlər, eləcə də düymə paneli korroziyaya uğrayıb.
