Qəsdən adam öldürməyə cəhddə və quldurluqda təqsirləndirilən Şri-Lanka vətəndaşları ilə bağlı cinayət işi üzrə yeni məhkəmə baxışı keçiriləcək.
Məlumata görə, 1980-ci il təvəllüdlü Rathnayake Nuvan, 1992-ci il təvəllüdlü Sedara Munasinghe və onun həyat yoldaşı, 2000-ci il təvəllüdlü Dinesh Geethackarigen barələrindəki qərardan kassasiya şikayəti veriblər.
İşə Ali Məhkəmədə hakim Teyyub Muxtarovun sədrliyi ilə baxılıb. Kassasiya şikayəti qismən təmin edilib, Sumqayıt Apellyasiya Məhkəməsinin qərarı ləğv olunub və cinayət işi yeni məhkəmə baxışına təyin edilib.
İttihama görə, təqsirləndirilən şəxslər 2022-ci il sentyabrın 21-də Masazır qəsəbəsində Pakistan vətəndaşı Dinuka Pathiraya və onun atası Dammikanı öldürməyə cəhd edib, daha sonra onların pul və telefonlarını götürüblər.
Hadisə zamanı zərərçəkənlər döyülərək halsız vəziyyətə salınıb, əl-ayaqları bağlanıb və mənzilin qapısı arxadan kilidlənərək tərk edilib. Həmçinin mənzildəki qaz balonunun klapanının açıldığı və bunun digər şəxslərin də həyatı üçün təhlükə yaratdığı bildirilib.
Dinuka Pathira sonradan özünün və atasının əl-ayağını açaraq qaz balonunun klapanını bağlayıb və polis əməkdaşlarının köməyi ilə mənzildən çıxıb.
Sumqayıt Ağır Cinayətlər Məhkəməsinin hökmü ilə Rathnayake Nuvan və Sedara Munasinghe hər biri 15 il, Dinesh Geethackarigen isə 14 il 9 ay müddətinə azadlıqdan məhrum edilib. Sumqayıt Apellyasiya Məhkəməsi hökmü qüvvədə saxlayıb.
İndi işə apellyasiya instansiyasında yenidən baxılacaq.
Mənbə: Pravda.аz
