Azərbaycan Milli Anti Dopinq Agentliyi (AMADA) “Qəhrəmanların və dahilərin izi ilə təmiz qələbələrə doğru” adlı tədbir keçirib. Sumqayıt24 bu haqda İctimaiTV-ə istinadən xəbər verir.
Tədbirdə 2 qat paralimpiya çempionu İlham Zəkiyev, 3 qat dünya və 3 qat Avropa çempionu, olimpiya oyunlarının gümüş və bürünc medalçısı, sərbəst güləşçi Hacı Əliyev, olimpiya, dünya və avropa çempionatlarının mükafatçısı, boksçu Kamran Şaxzuvarlı, avropa çempionu, olimpiya oyunları və dünya çempionatlarının mükafatçısı cüdoçu Rüstəm Orucov, futbolçu Ruslan Abışov və digər məhşur idmançılar iştirak ediblər.
“Biz AMADA olaraq idmanda ədalət prinsipini daha geniş təbliğ etmək üçün müəyyən tədbirlər keçirmək fikrinə gəldik. Biz düşündük ki, Şuşa şəhərində tədbir keçirək, çünki bildiyiniz kimi 2022-ci il Şuşa ili elan olunub və Şuşa ədalətin bərqərar olduğu məkandır və Şuşanın işğaldan azad olunduğu gün bizim Zəfər günümüzdür”, - AMADA-nın direktoru Şəfəq Hüseynli bildirib.
Görüşdə geniş müzakirələr aparılıb. Sonra idmançıların iştirakı ilə Şuşada çəkilən videoçarxın təqdimatı olub.
