İndoneziya səfirliyinin əməkdaşları Sumqayıt Kimya Sənaye Parkında olublar. Sumqayıt24 bu haqda 16 iyul tarixində Scip.az-a istinadən xəbər verir.
İqtisadi Zonaların İnkişafı Agentliyinin (İZİA) İdarə Heyətinin sədri Elşad Nuriyev səfir Hildi Hamid və digər qonaqlara ölkəmizdə fəaliyyət göstərən sənaye zonaları və aqroparklarda yaradılmış şəraitdən danışıb. Həmçinin sənaye zonalarının təqdimatı keçirilib.
Səfir İndoneziya şirkətlərinin tikininti materiallarının istehsalı və tekstil sahələrində, işğaldan azad edilmiş ərazilərimizdə yaradılan sənaye parklarında həyata keçiriləcək layihələr üzrə əməkdaşlıqda maraqlı olduqlarını bildirib. Həmin şirkətlərin sənaye zonalarına investisiya yatırması, burada istehsal olunan məhsulların ixrac imkanları və digər əməkdaşlıq məsələləri müzakirə edilib.
Sonda səfirlik əməkdaşları Kimya Sənaye Parkında görülmüş işlərlə, “Alco” MMC-nin sürkü yağları istehsal müəssisəsində və “STP” MMC-nin Kabel zavodunda istehsal prosesi ilə tanış olublar.
