Sumqayıtda şəhid Samir İslamovun ailəsi ziyarət edilib. Bu barədə 7 fevral tarixində Regional Mədəniyyət İdarəsinə istinadən xəbər veririk.
S. Vurğun adına Mərkəzi Kitabxananın əməkdaşları şəhid kapitan Samir İslamovun doğum günü ərəfəsində ailəsi ilə görüşüb, onun haqqında geniş söhbət aparıblar.
Qeyd edək ki, Samir Vətən müharibəsi zamanı Tərtər rayonunun Talış kəndinin azadlığı uğrunda gedən döyüşlərdə iştirak edib. Cəsur komandir həm də müharibədə əsgərlərə təlim keçib. S. İslamov 2020-ci ilin 9 oktyabrında Talış döyüşləri zamanı şəhid olub. Sumqayıt Şəhidlər xiyabanında torpağa tapşırılıb.
Prezident İlham Əliyevin Sərəncamı ilə ölümündən sonra 3-cü dərəcəli “Rəşadət” ordeni, "Vətən uğrunda", "Hərbi xidmətlərə görə", "Suqovuşanın azad olunmasına görə" medalları ilə təltif edilib.
Samir ailəli idi. Dörd övladı yadigar qalıb.
