Bakı-Sumqayıt ekspres avtobuslarının sərnişin sıxlığı və tıxacları aradan qaldıracağı ilə bağlı ekspert danışıb. Bu haqda 23 yanvar tarixində Sumqayıt24 Xeberle.com-a istinadən məlumat verir.
Xəbər verdiyimiz kimi, Bakı Avtovağzalından Sumqayıt Avtovağzalına və əks-istiqamətə ekspres marşrut xətti fəaliyyətə başlayıb.
Mövzu ilə bağlı nəqliyyat sahəsi üzrə ekspert, hüquqşünas Ərşad Hüseynov bildirib ki, Sumqayıt və Bakı arasında yeni ekspres avtobus marşrutunun işə düşməsi irəliyə doğru ciddi addımdır: "Lakin görüləcək işlər hələ çoxdur. Dəfələrlə vurğuladığımız kimi, bu iki şəhər arasında təkcə vağzaldan vağzala sərnişindaşıma ciddi uğurlar gətirməyəcək. Ona görə də Sumqayıtın bir neçə yerindən Bakının bir neçə yerinə və əksinə ictimai nəqliyyat təşkil edilməlidir”.
Onun sözlərinə görə, iki şəhər arasında qatarla daşıma imkanları da ciddi yaxşılaşdırılmalıdır: "Bunun imkanları araşdırılmaqla daha kiçik tutumlu (ehtiyac olan istiqamətdə həm də iritutumlu) avtobuslarla ekspres marşrutlar yaradılmalıdır. Bu iki şəhər arasında qatarla daşıma imkanları da ciddi yaxşılaşdırılmalıdır. Əks təqdirdə iki şəhər arsında fərdi avtomobillər və taksilərlə səyahət sayını azaltmaq asan olmayacaq”.
Digər nəqliyyat eksperti Eldar Bəşirov tıxacın aradan qaldırılması və avtobus qıtlığının bir daha olmaması barədə müsbət bir şey deyə bilməyəcəyini qeyd edib: "Əvvəlcə deyim ki, yeni avtobusların ayrılması ilə bağlı gözümüz aydın. Lakin Bakı-Sumqayıt yolunda tıxacın aradan qaldırılması və avtobus qıtlığının bir daha olmaması barədə müsbət bir şey deyə bilmərik. Köhnə hamam, köhnə tas olacaq. Nə qədər ki, yeni yollar açılmayacaq, tıxac problemi olduğu kimi qalacaq. Avtobusların sayını da artırsalar, daha yaxşı olar. Bu da onların insafına baxır”.
