Qadına xəsarət yetirən 32 yaşlı Elvin Kamalov (ad və soyad şərtidir) cərimələnib. Sumqayıt24 bu haqda 19 avqust tarixində Bizim.media-ya istinadən xəbər verir.
Hadisə Sumqayıt şəhərində yerləşən “Esmira” şadlıq sarayının yaxınlığında baş verib. Təqsirləndirilən şəxs qismində ifadə verən Elvin bildirib ki, Aygül (ad şərtidir) ilə 1 il əvvəl tanış olub:
“Hadisə günü Aygülü yaşadığı ünvandan götürdüm və şəhər ərazisində bir qədər avtomobilimdə gəzdik. Sonra “Esmira” şadlıq sarayının yaxınlığında idarə etdiyim “Hyundai Elantra” markalı maşında Aygül məni təhqir etdi. Buna görə də aramızda mübahisə yarandı. Bərk qəzəblənərək onun üzünə şillə vurdum”.
O, bundan sonra maşını saxlayıb və Aygülü maşından düşürərək oradan uzaqlaşıb. Elvin əməlindən peşman olduğunu və barışmağa cəhd göstərsə də, bunu edə bilmədiyini qeyd edib.
İfadə verən Aygülün sözlərinə görə, avtomobildə söhbət edərkən Elvin ona əxlaqsız təklif edib:
“Buna görə aramızda mübahisə düşdü. Mübahisə zamanı Elvin məni döyərək müxtəlif dərəcəli xəsarətlər yetirdi”.
Qadın əlavə edib ki, Elvinə “Hyundai Veloster” markalı maşınını satmaq üçün verib. Görüşün əsl səbəbi isə maşınını satıb, əvəzində digər maşın almaq istəyi olub:
“Elvinlə görüşərkən maşınımı satmaq əvəzində o, əxlaqsız təkliflər etdi. Bundan bərk əsəbləşərək maşında onunla mübahisə etdim”.
Sumqayıt şəhər Məhkəməsinin hökmü ilə Elvin 1200 manat miqdarında cərimə cəzasına məhkum edilib.
