Sumqayıtda şəhid Şəhriyar Quliyevin ailəsi ilə görüş keçirilib. Sumqayıt24 bu barədə 1 noyabr tarixində Regional Mədəniyyət İdarəsinə istinadən xəbər verir.
“Zəfər tariximizin izi ilə” layihəsi çərçivəsində keçirilən tədbir Mərkəzi Uşaq Kitabxanasında baş tutub. Burada 1 və 12 nömrəli tam orta məktəblərin şagird və müəllim kollektivləri iştirak ediblər. Əvvəlcə şəhidlərimizin əziz xatirəsi bir dəqiqəlik sükutla yad edilib. Çıxış edən kitabxana mütəxəssisi Leyla Mahmudova qəhramanın həyat və döyüş yolu haqqında məlumat verib, şəhidə həsr olunan “Sən hər kəsin qürurusan” adlı videoçarxı təqdim edib. Sonra qəhrəmanın anası Xalidə Quliyeva, atası Nəsib Quliyev, həyat yoldaşı Pərvin Quliyeva, ibtidai sinif müəlliməsi Lətafət Quliyeva Şəhriyar haqqında acılı-şirinli xatirələrini bölüşüblər. Toplantı vətənpərvərlik ruhunda şeirlər, musiqi nömrələri və kompozisiyalar ilə davam edib.
Tədbirdən sonra kitabxana əməkdaşları bir qrup şagirdlərin iştirakı ilə Şəhidlər xiyabanını ziyarət edib, memorial kompleksdə “Qalib əsgər” heykəlinin və Şəhriyar Quliyevin məzarın önünə gül dəstəsi qoyublar. Onlar Vətən uğrunda canından keçən şəhidlərin xatirəsini ehtiramla anıblar.
