Sumqayıtda seçki hüququ ilə bağlı müraciətlərə baxılmasına həsr edilən regional seminar keçirilib. Sumqayıt24 bu haqda 27 dekabr tarixində xəbər verir.
Tədbir Mərkəzi Seçki Komissiyası və Hüquq və İnsan Haqları İnstitutunun layihəsi çərçivəsində təşkil olunub. Burada hüquq və insan haqları üzrə mütəxəssislər, Abşeron, Sumqayıt, Quba, Xızı, qərb zonası üzrə dairə seçki komissiyalarının ekspert qruplarının üzvləri iştirak ediblər.
Mərkəzi Seçki Komissiyası Katibliyinin müdiri İlqar Əlizadə “Seçki hüquqlarının pozulması ilə əlaqədar müraciət və şikayətlərə baxılması üzrə qanunvericiliyin tələbləri və şikayətlərin araşdırılması prinsipləri”, Hüquq və İnsan Haqları İnstitutunun İnsan hüquqları üzrə təlim və ekspertiza şöbəsinin müdiri Vüsalə Muradxanlı isə “Avropa İnsan Hüquqları Konvensiyasında azad seçki hüququ (1 hissə)” mövzusunda təqdimatlarla çıxış ediblər.
Komissiyanın üzvü Nailə Əsgərova, institutun İnsan hüquqları üzrə təlim və ekspertiza şöbəsinin təlimçi-eksperti Hamlet Babayev seçkilərlə bağlı Ekspert qruplarının fəaliyyətlərinin əsasları, kazuslar üzrə praktiki məşğələlər, sinaq testlərin həlli və digər məsələlər ətrafında danışıblar.
Sonda məşğələlər keçirilib, iştirakçılar üçün sınaq testlər təşkil olunub, yeni yaddaş kitabçası paylanılıb.
Xatırladaq ki, 7 fevral 2024-cü ildə Azərbaycan Respublikasında növbədənkənar prezident seçkiləri olacaq.
