Sumqayıt şəhər Mərkəzləşdirilmiş Kitabxana Sisteminin işçiləri görüşdə iştirak ediblər. Sumqayıt24 bu haqda Millikitabxana.az-a istinadən xəbər verir.
Virtual keçən görüş “Elektron informasiya resurslarının yaradılması: mövcud vəziyyət və problemlərin həlli yolları” mövzusunda olub. Burada Sumqayıtla yanaşı, ölkənin müxtəlif şəhər və rayonlarından da nümayəndələr qatılıb.
İştirakçılara kitabxanaların fəaliyyətinin mövcud vəziyyətini analiz etmək, problemləri aydınlaşdırmaq, onların həlli yolları və baş verən yeniliklər barədə məlumat verilib. Milli Kitabxananın direktor müavini, tarix üzrə fəlsəfə doktoru Ədibə İsmayılova iştirakçılara hər kəsə açıq olan elektron kitabxana, tammətnli məlumat bazaları, virtual sərgilərdən danışıb, onları öz işlərində bu resurslardan yararlanmağa və təşkil ediləcək bütün treninqlərdə fəal iştirak etməyə dəvət edib.
Milli Kitabxananın əməkdaşı Təranə Cəfərova respublika MKS-də elektron kataloq və elektron kitabxananın formalaşdırılması xüsusiyyətləri haqqında çıxış edib. Bu sahədə müasir vəziyyət təhlil edilib, meydana çıxan problemlər, keyfiyyətin artırılması yolları və s. istiqamətlərdə müzakirələr aparılıb. Sonda isə aktual suallar cavablandırılıb.
