Nizami Kino Mərkəzində “Poladın izi ilə” filminin təqdimatı olub. Sumqayıt24 bu barədə Report-a istinadən xəbər verir.
Azərbaycanın Milli Qəhrəmanı, general-mayor Polad Həşimova həsr olunan filmin təqdimat mərasimində onun ailə üzvləri, döyüş yoldaşları, dostları, mədəniyyət nazirinin müavini Elnur Əliyev, Türkiyənin səfiri Cahit Bağcı və ictimaiyyət nümayəndələri iştirak ediblər.
Nazir müavini öz çıxışında bildirib: “Qəhrəmanların olması millətin, xalqın böyüklüyünü göstərir. Hər zaman böyük millətlərin tarixini onun qəhrəmanları yazıb”.
Türkiyənin ölkəmizdəki səfiri Cahid Bağçının sözlərinə görə, Polad Həşimovla bağlı bildiklərimizlə yanaşı, bilmədiklərimiz də var. Bu film vasitəsilə onları öyrənəcəyik.
Şəhidimizin anası Səmayə xanım Həşimova filmin ərsəyə gəlməsində əməyi olan şəxslərə təşəkkürünü bildirib: "Polad Həşimov Azərbaycan xalqının qəhrəmanıdır. O, 28 il orduda xidmət edib. Onun necə yetişməsini el-aləm bilir. Onun haqqında danışmaq fəxrlidirsə, o qədər də çətindir. Polad Həşimov öz şəhidliyi ilə Azərbaycan xalqının enmiş başını dikəldib".
Çıxışlardan sonra isə film nümayiş olunub.
