Sumqayıtda 10 mart – Milli Teatr Günü premyera ilə yadda qalacaq.
Sumqayit24.az xəbər verir ki, Sumqayıt Dövlət Dram Teatrında həmin gün tanınmış tatar dramaturqu Taufiq Minullinin "Ərmağanlı Əlməndər" əsəri əsasında hazırlanan "Sonuncu qonaq" tamaşasının premyerası olacaq.
Yeni səhnə əsərinin quruluşçu rejissoru Sumqayıt Dövlət Dram Teatrının aktyoru, Xalq artisti, Prezident təqaüdçüsü Valeh Kərimovdur.
Bu tamaşa eyni zamanda uzun müddət teatrdan uzaq düşən görkəmli teatr və kino aktyorunun yenidən səhnəyə qayıdışı ilə əlamətdardır. Sənətkar səhnə əsərində baş qəhrəmanı – Əlməndər obrazını canlandıracaq.
Tamaşanın quruluşçu rəssamı Nizami Dadaşev, musiqi tərtibatçısı Gülcahan Yusifova, rejissor köməkçisi Ləman Məmmədli, rəqslərin quruluşçusu Kamil Ağazadədir. Səhnə əsərində Əməkdar artistlər Fəranə Musayeva, İlahə Səfərova, aktyorlar Oktay Mehdiyev, Akif Mirzəyev, Şəms Abdullayeva, Füzuli Qərənizadə, Elay Xasiyev və Aynur Hümmətova rol alacaqlar.
"Sonuncu qonaq" fəlsəfi çalarları, incə yumoru və dramatik qarşıdurmaları ilə seçilən səhnə əsəridir. Əsərin mərkəzində əzrail tərəfindən unudularaq yer üzündə qalan 91 yaşlı, həyata möhkəm bağlanan qoca Əlməndər dayanır. Həyat eşqi sönməyən, yenidən sevgi və macəra axtarışında olan Əlməndər gözlənilməz qonağı – əzraillə üz-üzə qalır…
Tamaşa boyunca həyat və ölüm, insanın iradəsi, sevgi, zaman və taleyin qaçılmazlığı dərin fəlsəfi prizmadan təqdim olunur. Sonda isə Əlməndər taleyi ilə barışaraq son qərarını verir.
Qeyd edək ki, Valeh Kərimov yamaşaçıların yaddaşında ən çox "Moşu Göyəzənli" kimi qalıb.
