Bu gün şəhid Şirbala Hüseynovun mövlud günüdür. Onun 32 yaşı tamam olacaqdı.
Şirbala 6 may 1990-cı ildə Sumqayıt şəhərində anadan olub. O, Tağıyev qəsəbəsində yerləşən 6 saylı məktəbdə oxuyub. Uşaqlıq arzusunu həyata keçirmək üçün 2008-ci ildə Ali Hərbi Məktəbə daxil olub.
25 iyul 2012-ci ildə Şirbala leytenant rütbəsi alaraq Beyləqan rayonunda yerləşən “N” saylı hərbi hissədə xidmət etməyə başlayır. 2016-cı ilin “Aprel döyüşləri”ndə göstərdiyi qəhrəmanlığına görə baş leytenant, 2019-cu ildə isə kapitan rütbəsinə yüksəlir.
Kapitanımız 44 günlük müharibə zamanı döyüş yolunu Horadiz istiqamətindən başlayır və Cəbrayılın Nüzgar kəndinə qədər vuruşur. 3 döyüş yoldaşını yanan tankın içərisindən çıxararaq xilas edən Şirbala oktyabrın 2-si Füzuli istiqamətində gedən döyüşlərdə şəhid olur.
Hüseynov “Şəhidlər Xiyabanı”nda dəfn olunub.
Kapitan ölümündən sonra “Vətən uğrunda” və “Füzulinin azad olunmasına görə” medalları ilə təltif edilib.
