2020-ci il sentyabrın 27-də Ermənistan silahlı qüvvələrinin cəbhəboyu törətdiyi genişmiqyaslı təxribatlara cavab olaraq Azərbaycan Ordusu əks-hücum əməliyyatına başladı. Bu əməliyyat nəticəsində Vətən müharibəsi başlandı və 30 il davam edən işğala son qoyan möhtəşəm Qələbə ilə başa çatdı.
Bu gün haqq savaşımızın 37-ci günü kimi tarixə düşüb.
Sumqayit24.az xəbər verir ki, 2020-ci il noyabrın 2-də Azərbaycan Ordusu Cəbrayıl rayonunun Çaprand, Hacı İsaqlı, Qoşabulaq, Zəngilan rayonunun Dərə Gilətağ, Böyük Gilətağ, eləcə də Qubadlı rayonunun İşıqlı, Muradxanlı və Milanlı kəndlərini işğaldan azad edib.
Həmin gün döyüşlər əsasən Ağdam, Xocavənd və Qubadlı istiqamətlərində gedib. Ordumuz düşmənin Su-25 tipli döyüş təyyarəsini məhv edib, həmçinin Ermənistan qüvvələrinə məxsus dörd ədəd BM-21 "Qrad" yaylım atəş sistemi, bir "KUB" zenit-raket kompleksi, daimi dislokasiya məntəqəsi, səngərlər və atəş mövqelərində yerləşən canlı qüvvə sıradan çıxarılıb.
