Ceyranbatan - Xocəsən metro stansiyası-Ceyranbatan müntəzəm avtobus marşrutu müsabiqəyə çıxarılır. Məqsəd sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılmasıdır. Sumqayıt24 bu haqda 3 mart tarixində Report.az-a istinadən xəbər verir.
Rəqəmsal İnkişaf və Nəqliyyat Nazirliyinin (RİNN) elan etdiyi müsabiqəyə qatılmaq üçün tələb olunan sənədlər martın 17-si saat 17:00-dək, ixtisas məlumatları isə aprelin 7-si saat 17:00-dək AYNA-ya (ünvan: Bakı şəhəri, Tarzən Hacı Məmmədov küçəsi 5, əlaqələndirici şəxs: Ramil Musayev – tel.: 012-567-99-76, 055-512-34-97, e-poçt: [email protected]) təqdim edilməlidir. Göstərilən vaxtdan gec təqdim olunan zərflər açılmadan geri qaytarılacaq.
Təkliflər komissiya tərəfindən Ceyranbatan-Xocəsən metro stansiyası-Ceyranbatan istiqamətində aprelin 14-də müsabiqə keçirilən zaman açıqlanacaq. İddiaçılar və onların rəsmi müvəkkil etdikləri səlahiyyətli nümayəndələr komissiyanın iclasında iştirak edə bilərlər.
Müsabiqə “Avtomobil nəqliyyatı haqqında” Qanuna, “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir.
